شعبولا لا يترك مناسبة الا وترك بصمة فيها , ومش معقولة يكون العالم كله بيتكلم عن اوباما والراجل يقعد ساكت من غير شوية " ايييييييييييييييه " آخر ابداعات اسلام خليل المؤلف الأزلى لشعبولا عن انتخاب أوباما رئيسا للولايات المتحدة الأمريكية , وعن فرحة العرب بانتخابه لأنه أفضل من سلفه بوش اللى بيقول شعبولا عليه " بوش ابن المجنونة " شعبولا مفيش حد يقدر يقول له .
كلمات الأغنية بتقول : يا سكة الندامة يا دنية الوحوش.. إياك باراك أوباما مايكنش زى بوش.. بوش يخرب بيته باعنا وضيّعنا سنين وأوباما الناس فاكرين هيكون صلاح الدين.. ما هو بوش ابن المجنونة شعللها فى كل مكان.. أفغان وعراق وغزة وآخرها سوريا كمان.. هيعمل إيه أوباما فى مصايب بوش وأبوه..
بلاش من بدرى نحلم ليكون الحلم كابوس.. خلينا زى ما احنا ما الهم أخدنا عليه.. راح بوش وجه أوباما إيه يعنى هيحصل إيه.. لسه فلسطين محتلة والحرب فى العراق.. والناس عايشة فى مذلة وعداء بيجيب عداء.. مهما هيعمل أوباما ويلف شمال ويمين.. لا هيرجع الحريرى ولا حتى الشيخ ياسين.. سلامتك ألف سلامة يا عم عربى عليك.. قاعد مستنى أوباما علشان ياخد بإيديك.. ولا بوش ولا أى أوباما تانى هيفكر فيك.. يا عربى مفيش غير إيدك هى اللى راح تحميك.
آه والله شعبولا هيقول كده والخبر نشرته المصرى اليوم http://www.almasry-alyoum.com/article2.aspx?ArticleID=185733&IssueID=1219
ووجهة نظر شعبولا معقولة , وهى من باب كسر القلل ورا الأخ بوش وأعوانه , ومن باب الحذر من الوافد الجديد " أوباما " . استقبال العرب لأوباما استقبال يؤكد مدى سطوة أمريكا علينا بكل شكل وأن مصائرنا ليست دائما بأيدينا بل بأيدى الأوباماويين والبوشيين ومن قبلهم الكلينتونيين . العرب لم يستقبلوا رئيس الولايات المتحدة بل استقبلوا رئيسهم فهم اختاروه ولم يختاروا رؤسائهم الذين يحكمونهم بالفعل . استقبال العرب لأوباما يعبر عن حالة ذل ومهانة ورغبة فى أن نكون مثل الأمريكيين ونختار مثلهم لا أن يختار لنا الآخرون .
سألت نفسى ماذا تملك مصر أو العرب للضغط على أوباما ؟ وجدتها علاقة تبعية من الألف الى الياء حتى وان فاز ماكين كنا سنغير الاسم فقط لنهنئه ونتمنى استمرار العلاقات , وكما قرأت اليوم تصريح بأن العلاقة بين أمريكا ومصر علاقة أزلية أشبه بالزواج الكاثوليكى , ولكن الأكيد فى هذه العلاقة أن مصر ليست لها القوامة بل هى المطيعة وصاحبة رد الفعل دائما . فى اليوم التالى لا نتخاب أوباما حذر الرئيس الروسى ميديديف من نشر الدرع الصاروخى وأن روسيا ستقابل لك برد عنيف , وقامت ايران باسقاط مروحييتين أمريكتين على حدودها مع العراق واللى خايف يروح . انما نحن سنبقى منتظرين وماسكين الوردة هو حلو ولا وحش , هيضربنا مش هيضربنا , هيطلع عينينا ولا هيقلع ضوافرنا بس .
ليست هناك تعليقات:
إرسال تعليق